TEMA : WIKANG FILIPINO: TINIG NG MGA GURO, TINIG NG MGA MAG-AARAL, WIKA NG KABAYANIHAN

PILIPINO KA, IPAGMALAKI MO !

Ang mga matatalino, pinagmamalaki ang kanilang mga utak. Ang mga mayayaman, pinagmamalaki ang kanilang pera. Ako, hindi man matalino o mayaman, may isang bagay akong ipinagmamalaki at habang buhay kong ipagmamalaki, at iyon ay ang aking wika, ang Wikang Filipino.

Bilang isang Pilipino at mamamayan ng ating bansa, kailangan nating simulan ang pag-unlad sa ating mga sarili. Paano kaya? Simple lang. Gamitin, alagaan at pagyamanin natin ang ating sariling wika. Kung hindi natin ito sisimulan, paano uunlad ang ating bansa? Kung hindi ngayon, kailan pa? Imulat mo ang iyong mga mata, Kaibigan! Maraming mga bata ang hindi nakapag-aral dulot ng kahirapan. Maraming mga Pilipino ang hindi marunong magbasa at sumulat. Paano tayo magkakaisa kung hindi naman natin maiintindihan ang ating kapwa Pilipino?

Tangkilikin natin ang sariling atin. Gamitin natin ito sa mabuting paraan. Bigyan natin ito ng pagpapahalaga. Lalo na ang ating Wika, sapagkat ito ang daan upang lahat tayo'y magkaisa. Dugong kayumanggi ka! Ipagmalaki mo na ika'y Pilipino! Simulan mo ngayon, kaibigan!

This is an entry to the Buwan ng Wika 2011 Blog Writing Contest sponsored by the Alabel National Science High School-SAKAFIL and The Teacher’s Notebook

TEMA : WIKA ANG INSTRUMENTO SA MGA PATAKARANG PANGKAUNLARAN AT PANGKATARUNGAN

" WIKANG FILIPINO, SUSI SA KAUNLARAN "

Tayong lahat ay may mga pangarap sa buhay. Marami tayong mga bagay na gustong gawin at palaganapin. Isa na dito ay ang makapagtapos ng pag-aaral. Ngunit, bilang isang Pilipino, nararamdaman ko rin ang sakit at hirap na nararanasan ng mga batang may mga pangarap at hindi naman nila matutupad. Marami nga ang umaangat at nakakapagtapos ng pag-aaral, pero isipin natin iyong mga batang natutulog sa kalye, nanglilimos, walang makain at walang kamuwang-muwang sa mundo. Paano na sila?

Ang Pilipinas ay isang demokratikong bansa. May mga batas tayong sinusunod upang walang gulong magaganap at maayos ang pamumuhay ng lahat. Ngunit, nasa Pilipinas tayo! Wikang Filipino ang ating wika! Pero bakit Ingles ang ginagamit na wika sa mga batas na pinapahayag? Hindi ba natin napapansin ang ating kapaligiran? Imulat natin ang ating mga mata, kababayan! Maraming mga bata ang hindi marunong magbasa at magsulat. Paano pa kaya uunlad ang ating bansa, kung maraming mga tao ang hindi nakakaintindi ng wikang banyaga?

Kailangan nating magkaisa! Pero paano natin ito sisimulan? Sino ang unang gagawa ng hakbang? Hindi ang inyong mga magulang. Hindi ang inyong mga guro. At lalong hindi ang inyong mga kaibigan. Kundi sa iyo. Ikaw ang simula ng pagbabago! Gawin mo ang kaya at nararapat mong gawin, Kaibigan!

TEMA : WIKA SA PAGPAPATUPAD NG KAUNLARAN AT DISIPLINA SA BAYAN

" WIKA NATI'Y SUSI SA KAUNLARAN "

Ang gagaling nilang sumayaw at kumanta, hindi ba? Naaliw at nagandahan tayo sa kanilang mga itsura at sa kanilang pananamit. Bago ang lahat, tingnan at pakinggan muna natin itong isa pang video. 

Marahil ay hindi na ito binigyang pansin ng iba. Sa pananamit pa lamang nang grupong nauna ay malayong malayo na kumpara dito. Ngunit, habang tayo'y nakikinig sa kanta, hindi ba't may magandang mensahe itong sinasabi? Sa unang kanta, may mensahe ka bang narinig? 

Sa eskwelahan, patok na patok ang mga KPOP groups, KPOP dramas at iba pa. Kahit saang lugar sa eskwelahan, KPOP groups lagi ang pinag-uusapan. KPOP dito, KPOP doon. Ang iba, sa sobrang paghanga ay ginaya na nila ang paraan ng pananamit at sinikap pa nilang pag-aralan ang wika nila. 

Gumising ka, kaibigan! Ikaw ay Pilipino! Wikang Filipino ang dapat mong bigyang halaga. Ngunit, anong iyong ginagawa? Ang bansa nati'y naghihirap na. Ngunit, tayong mga Pilipino'y wala paring ginagawa. Sinisisi natin ang pamahalaan, pero ni minsan ba naisip niyo, tayo rin ang gumagawa ng sarili nating desisyon? Wala tayong ibang ginawa kundi manghusga! Paano uunlad ang ating bansa kung wala tayong pagkakaisa?

Pagkakaisa at disiplina ang kailangan natin upang Pilipinas ay umunlad!Tangkilikin natin ang sariling atin, sapagkat tayo ay Pilipino!

This is an entry to the Buwan ng Wika 2011 Blog Writing Contest sponsored by the Alabel National Science High School-SAKAFIL and The Teacher’s Notebook.